მთავარი » » ქეთევან ნათელაძე - ნუ გადამარჩენ!.. / qetevan nateladze - nu gadamarchen!..

5:27 PM

ქეთევან ნათელაძე - ნუ გადამარჩენ!.. / qetevan nateladze - nu gadamarchen!..

ნუ გადამარჩენ, თუ ტკივილმა ხატა თვალები,
თუ მძიმე ხვედრი აკისრია ბედის განაჩენს,
ჯვრის საწერად რომ იქუხებენ ტაძრის ზარები,
ხელს ნუ შემიშლი და განწირულს ნუ გადამარჩენ!
ნუ გადამარჩენ, მისტიურს რომ მშთანთქავს დარდები,
და რითმები რომ მოასწრებენ აფრად აშვებას,
ნუ გადამარჩენ, მწუხრისას რომ კლდეზე დავდგები,
ტანმოზიდული, ჩანჩქერივით გადასაშვებად.
ნუ გადამარჩენ, ნუ განდევნი ცრემლის სურავანდს,
ნუ შეეცდები შეიცვალოს ჩვენი როლები,
როცა სუყველა გამიმეტებს დასაღუპავად,
ნუ გადამარჩენ, სუყველას ნუ შეებრძოლები.
ნუ გადამარჩენ, გზააბნეულს ბედის გამოცდით,
მე ფოთოლცვენის არ ვესწრები ყვითელ ჩვენებებს,
ნუ გადამარჩენ უსუსურს და ძალაგამოცლილს,
როს დამწყევლიან ქარები და შემაჩვენებენ...
წამომეწევა ქარიშხალი და დარდს ამიშლის,
ნუ შეეცდები და ნუ შეცვლი ამ მკაცრ განაჩენს,
ამ სიყვარულის დამანგრეველ აპოკალიფსში
დაღუპვა მინდა, გევედრები, ნუ გადამარჩენ!..

ქეთევან ნათელაძე.