მთავარი » 2013 » მარტი » 20 » ეს ცხოვრება ზღაპარია

7:27 PM

ეს ცხოვრება ზღაპარია

ეს ცხოვრება ზღაპარია ჯიმა,
ზღაპარია ჯიმა ძველისძველი,
ვიცი, ბედმა რომ არ გაგიღიმა,
მაგრამ ნაღველს სიყვარული შველის.

ციდან ოქროს ფანტელები ცვივა,
გვირილებით მოიჩითა ველი,
გაერევა ზოგჯერ ცრემლის წვიმა,
მაგრამ ცრემლსაც სიყვარული შველის.

ქვეყნად ყველა თავის ბედზე ჩივა,
სულ ერთია, ბრძენია თუ ხელი,
გულს უწამლე, სანამ დროა, - მტკივანს,
ტკივილს მხოლოდ სიყვარული შველის...

დაიჭიმა ყველა ნერვი სიმად,
მოდის დარდი, დარდი - შენი მცველი,
ვინმე უნდა შეიყვარო, ჯიმა,
მარტოობას სიყვარული შველის!