მთავარი » » გურამ ლაცაბიძე - პოეტებს სიკვდილი არ აშინებთ / guram lacabidze - poetebs sikvdili ar ashinebt

2:09 PM

გურამ ლაცაბიძე - პოეტებს სიკვდილი არ აშინებთ / guram lacabidze - poetebs sikvdili ar ashinebt

ჩვენ - პოეტები - როგორც მითებში,
ვიბადებით და ვიზრდებით კენტად.
თუ კი შეგვცივდა, ვთბებით რითმებში
ან თუ მოგვშივდა, სტრიქონებს ვკენკავთ.

და ველოდებით მუზების ნიშანს,
ვიწყებთ სისხამზე ქუჩაში გავლას.
ლექსის ბოლოდან დაწყება ნიშნავს,
ყველა დაღმართის აღმართად ავლას.

რადგან გრძნობები წყებად და წყებად,
მოჰგავს რაღაცით ჭადრაკის თამაშს.
როცა მზე ღრუბლის საწოლში წვება,
ჩვენ მთვარის აჩრდილს ვუკეთებთ შამათს.

ვიცვამთ პერანგებს, ნისლისგან ნაქსოვს,
დავიარებით იერით გიდის,
რადგან ყველა გზა ზეპირად გვახსოვს,
რაც პოეზიის კვალდაკვალ მიდის.

გავთელავთ ფრთხილად გულის არშიას,
სტროფებსაც ჩაგიღვრით მომეტებით,
პოეტებს სიკვდილი არ აშინებთ:
ლექსებად კვდებიან პოეტები!!!

გ.ლაცაბიძე