მთავარი » 2013 » დეკემბერი » 6 » დავით კვიტატიანი - ნუ მეგობარო... / davit kvitatiani - nu megobaro...

5:21 PM

დავით კვიტატიანი - ნუ მეგობარო... / davit kvitatiani - nu megobaro...

ნუ მეგობარო, ნუ იფიქრებ, თითქოს ხურდები
მოგაწოდე და არაფერი აღარ მაწუხებს.
იცი, მე დიდხანს, უსაშველოდ დიდხანს ვუნდები,
რომ შეველიო, ამ ცხოვრების ოხერ მარწუხებს.
ნუ მეგობარო, ნუ იფიქრებ, მხოლოდ ლექსია,
თითქოს მილხინს და თავისთავად შემომეწერა.
მოდი, ასე ვთქვათ, ეს ცხოვრება დასალეწია,
კაცი ყავარჯნით ელოდები, შემოგწირავენ.
ნუ მეგობარო, ნუ იფიქრებ, თითქოს მილხინდეს,
თითქოს ბოჰემას მიცემული ვიყო პოეტი.
მეც ხომ, (როგორ ვთქვა) საკუთარი ცოდვა მახრჩობს და
დორიანივით მიბერდება ჩემი პორტრეტი.
ნუ მეგობარო, ნუ იფიქრებ, ვიყო წმინდანი,
მხოლოდ იმიტომ, უქონელ კაცს თუ კი შევწირე,
საიქიოში, შენ იქნები ღმერთის წინაშე,
მერე, (რა იცი) ორი სიტყვაც შემომაწიო.