მთავარი » » სულხან წულუკიძე - ლექსი როინ აბუსელიძეს - როის / sulkhan tsulukidze - leqsi roin abuselidzes - rois

7:15 PM

სულხან წულუკიძე - ლექსი როინ აბუსელიძეს - როის / sulkhan tsulukidze - leqsi roin abuselidzes - rois

ხორცის ტკივილამდე რაღაც გამიხარდა,
გრძნობის ასახსნელად სიტყვა აღარ მყოფნის,
შენ კი ჩემო როი გასაყოფი ხარ და
მთელი პოეზია არის განაყოფი.

ვწერ ლექსს გუშინდელი გრძნობით დაზაფრული,
უკვე აღარ მარცხვენს სხვათა ირონია,
შენში ბევრად მეტი არის გაზაფხული,
შენში ბევრად მეტი გალაკტიონია.

ვწერ და მოპოეტოს მათრობს სტრიქონები,
თვალებს აელვებულს მძიმედ ვახამხამებ,
თითქოს ამ სტრიქონებს დიდხანს ვიგონებდი,
თითქოს ბევრი დილა ასე დავაღამე.

ვიცი სირცხვილია სიტყვა ნაქურდალი,
ვიცი სიტყვის არ ვარ კარგი აკრობატი,
მაგრამ მაინც ვიტყვი - როი გენაცვალე,
მერე შავ ღვინოსაც დავლევ დათრობამდე

ხორცის ტკივილამდე რაღაც გამიხარდა,
გრძნობის ასახსნელად სიტყვა აღარ მყოფნის,
რადგან ყველა ლექსის ყველა სტროფი ხარ და
მე კი ამ სტროფებით უკვე ავადმყოფი.