მთავარი » 2015 » თებერვალი » 7 » სულხან წულუკიძე - con te partiro / sulkhan tsulukidze - con te partiro

10:31 AM

სულხან წულუკიძე - con te partiro / sulkhan tsulukidze - con te partiro

ოთახი ცივი, შენ უსმენ ბოჩელს,
საწოლთან ჩუმი ფიქრების რიგი,
ოღონდაც ჩემი წვალება მორჩეს,
მერე კი სადმე ჯანდაბის იქით
წავალ, მანძილებს გავივლი იმდენს,
რამდენსაც ადრე - ქუსლების ცვეთით,
მსურს ახლა ისე უზომოდ წვიმდე,
რომ დასაფიცად არ დაგრჩეს წვეთი
ცრემლის და შენი თითების მომგვან,
ხეებს ქუჩებში გრიგალი ტეხავს,
თითქოს მათ შორის თითები მომყვა
და ქორწილამდე მორჩენას ვეღარ
დაველოდები. მივდივარ, მივდევ
შენ ისევ გცივა, შენ ისევ ბოჩელს
უსმენ და მეც მსურს სინანულს ვწვიმდე,
რომ მეპატიოს და ასე მოვრჩე.
ახლა ამ ლექსშიც მატულობს ღმერთი,
ლექსში, რომელიც მოხვდა ხარიხას,
ანუ იმ ადგილს, ანუ იმ წერტილს,
რომლის გამოღმა სულ სხვა ქალი ხარ
ჩემთვის და ვიხსნი ყოველგვარ ნიღაბს,
ღამეა ცივი, შენ უსმენ ბოჩელს,
წავალ, ჰო წავალ, ჯანდაბის მიღმა,
ოღონდაც ჩემი წვალება მორჩეს.