მთავარი » 2015 » თებერვალი » 7 » სულხან წულუკიძე - თითქოს დაგირჩა ყველაფერი გვიან / sulkhan tsulukidze - titqos dagircha kvelaferi gvian

10:42 AM

სულხან წულუკიძე - თითქოს დაგირჩა ყველაფერი გვიან / sulkhan tsulukidze - titqos dagircha kvelaferi gvian

თითქოს დაგირჩა ყველაფერი გვიან, არადა
საათების წინ დაბადებულს - სუნთქვაც გასუქებს
პასუხს - კითხვაზე, ცოცხალი ხარ? კი ან არადან
ირჩევ და მაინც ვეღარაფრით ვერ უპასუხე
უფალს, ამგვარად გეფიქრება ყველ;ა სიბილწე,
სხეულზე ეკლად დახვეული ძარღვთა სისტემა
გიმსხვრევს კიდურებს და უფალსაც მისთვის იფიცებ,
გინდა სულ ერთხელ დაიფიცოს შენზე ქრისტემაც.
რწმუნდები თვითონ ცხოვრებაა სიზმარგაუმტარ
ღამეებით რომ გაცალკევებს მრავალ ინდივიდს
შორის და შენში ცხოველივით ის ახმაურდა
რაც გახსოვს ბევრჯერ გადაყლაპე მწარე კრინტივით.
ასე თუ ისე, პოეზიის პეპლის საჭერით,
დასდევ ფილტვებში მიმოფანტულ ათას მეტასტაზს,
თითების ნელი მოძრაობით ნერვებს აჩერებ,
რომ არაფერი გემჩნეოდეს სახლში - დედასთან.
თითქოს დაგირჩა ყველაფერი გვიან, არადა
საათების წინ დაბადებულს - სუნთქვაც გასუქებს
პასუხს - კითხვაზე, გადარჩები? კი ან არადან
ირჩევ და მაინც ვეღარაფრით ვერ უპასუხე