მთავარი » » სულხან წულუკიძე - მე რომ ... / sulkhan tsulukidze - me rom ...

10:47 AM

სულხან წულუკიძე - მე რომ ... / sulkhan tsulukidze - me rom ...

მე რომ არ ვიყო შენთვის ლექსებს ვინღა დაწერდა,
მაგრამ სულ მალე დამერქმება ბოროტი ზრახვა,
გაირინდები კალმახივით ცაცხვის ფაცერთან
და მერე სულ სხვა დინებების პირისპირ წახვალ...
და მერე განმსჯი, განმსჯი მხოლოდ ცივი გონებით,
მონათლავ გიჟურ გამოხტომად ღმერთთან შეფიცვას,
იტყვი, რომ დიდხანს პოეტები ხალხის მონები
გეგონა მხოლოდ და რომ თურმე ხალხის მტრებიც ვართ.
თუმცა ჯერ ტირი, ტირი როგორც ზაფხულში მზე პირს
დაიბანს ისე, სწორედ ისე წვიმისას მე რომ
გჩუქნიდი სავსე დედამიწას იმდენად ზეპირს
(სისულელეა, სირცხვილია ლექსები ვწერო),
სადღაც კი თითქმის მილეული წარსული გლოვობს,
სტრიქონიც თითქოს დედასავით გადაყვა რითმებს.
გხედავ და შენი დალალების ოქროსფერ ბოლოს,
ჩემი ან უფრო საკუთარი თავივით ვითმენ.