მთავარი » » სულხან წულუკიძე - დედას (როცა ქალაქის უღიმღამო ქუჩებს მოვივლი) / sulkhan tsulukidze - dedas (roca qalaqis ughimghamo quchebs movivli)

11:00 AM

სულხან წულუკიძე - დედას (როცა ქალაქის უღიმღამო ქუჩებს მოვივლი) / sulkhan tsulukidze - dedas (roca qalaqis ughimghamo quchebs movivli)

როცა ქალაქის უღიმღამო ქუჩებს მოვივლი,
ვიწვი და შენზე უსასრულო ფიქრი იწყება.
მარტოობა კი მელოდება სახლში ცოლივით,
რომელსაც მუდამ ჰგონია, რომ გრიპის სიცხე მაქვს.
ახლა პირველი აპრილია, გარეთ სუსხია,
მალე იქნება ზაფხული და პაპანაქებაც,
ახლა ჩემს სხეულს უშენისფრო სისხლი უსხია
და შენს ჭაღარა ხვეულებში დაბანაკებას
ცდილობს. მგონია, მოთმინების იქით მევსები,
კაცი ვერაფრით ვერ გახდება ბედის მესაჭე
და სიტყვებივით ტყუილია ჩემი ლექსებიც,
(ო, ღმერთო ჩემო, რა ძალიან გავხართ დედაჩემს).
ვიცი, ხანდახან ნერვიულობ, ისიც კია, რომ
ფოტოებიდან მსაყვედურობ პოეტ ვაჟიშვილს,
უაზრობაა, იმ ქალაქზე იეჭვიანო,
სადაც არ უნდა გაგეშვი და მაინც გამიშვი...
------------------------------
როდესაც ქუჩებს ხეტიალით ვღლი და ვასრულებ,
როცა წარსულზე უსაშველო ფიქრი იწყება,
ვიწვი და ცრემლის ბურთულები კეტავს სასულეს,
ხალხს კი ჰგონია, ქრონიკული გრიპის სიცხე მაქვს.