მთავარი » » სულხან წულუკიძე - მარიკოს - იტყვი რომ მოგწონს ... / sulkhan tsulukidze - marikos - itkvi rom mogtsons ...

11:02 AM

სულხან წულუკიძე - მარიკოს - იტყვი რომ მოგწონს ... / sulkhan tsulukidze - marikos - itkvi rom mogtsons ...

იტყვი რომ მოგწონს,მაგრამ არც ისე
მოგწონს და წყეულ სიტყვებს გაწელავ,
ანდა რა იყო ამ ხნის მანძილზე,
ორი კინკილა ლექსის დაწერა....

მერე კი მივა,ვიღაც იყიდის,
ამ (მაინც) ლამაზ კაბას ცოლისთვის
და რჩები გუნდის წევრი რიგითი,
ერთ დროს იმავე გუნდის სოლისტი.

უცნაურია, დრო მოწიწებით
გეპყრობა,დგახარ ასე ირიბი,
უცნაურია, რომ ოცი წელიც
ვეღარ მოჭამე მიწას ჭირივით.

უხმოდ გაჰყვები, ძმობას გაუწევ
დუმილს და სიტყვებს აღარ გაწელავ,
მაინც რა იყო, ჩვენს სიყვარულზე,
ორი კინკილა ლექსის დაწერა,

რადგან თაიგულს ვარდებს უქებენ,
არა ბალახებს, ხმელს და უცინარს,
მაგრამ ეს არის რისი ჩუქებაც,
შენთვის შემეძლო დღეს და უწინაც.