Загрузка...
ლაშა გახარია - მარგალური / lasha gakharia - margaluri - 17 ივლისში 2015 - პოეზიის სამყარო
ოთხშაბათი, 2016-12-07, 0:50 AM
მოგესალმები სტუმარი | RSS

პოეზიის სამყარო

მთავარი » 2015 » ივლისი » 17 » ლაშა გახარია - მარგალური / lasha gakharia - margaluri


7:51 PM
ლაშა გახარია - მარგალური / lasha gakharia - margaluri
მარგალური ჯვეშ ნინა რე -
ქორთულიში ჯერღვი - ჭვერხი,
ორჩქილეთჷ - საღორონთო,
ვაუწყორუაფ ჭვახე რეხი.

მინ - ზესქვიში ჩილამური,
მინ - პელეტი დო მერეხი,
ქოთ - პეული, ქოთ - ჭუჭელი,
გურც ეფალირ შურ-ბინეხი.

მარგალური გვალო შხვა რე, -
ართო ბჟა დო ართო ცა რე,
დიდაშ ფართო კართე რე დო
მუმაშ ჸვანა დო ფაცხა რე.

ჸოროფაში წყურგილე დო
ღორონთიში აბარწა რე,
უჩა ბორჯიშ ალნანგარა,
გურიშ ელნაკარკაცა რე.

ჩქიმ მარგალურ სხუნილი რე -
კაჭალია ლაკადური,
ყამბარულო ნაფურცელა, -
სოთინ ვახოლ ნახაფული.

ხათე მანჯღვერც დუგორუნცჷ -
სიტყვას შარა აკართუნი…
ნჯღელ ზღვას ხოლო მიშარჩქინდჷ -
წკონდა წყურგილ ქაკათუნი.

ნინას ხოლო ნოკობუე
ბარგუა დო მაჟირუა,
ტყაში გჷთოტიტონუა,
წყარუა დო ლაჟირუა.

უმინჯ ჸვანა, გამგონებუ,
სარდაკიაქ დაჟღირუა…
ქემინჯი დო გაქშაბირცხე -
უმოღე დო ნაჟირუა.

ბრელც ვაუჩქჷ მარგალური,
მიშემონტყორ ძათანძალო,
წოლერ ჸვალი ცხვინც მებუ დო…
თუდო ღუმუს ნტყვილჷნც - ფალო.

გჷნძე ხერხალც ელაბირძღჷ -
ათოღანძგილ ხაჯიცალო,
უმოღესჷ ბურდღინჷნცჷ -
ქიანაში გაძიცალო.

ნინა ჯგჷრო ვაიჩქჷდა,
ჭარაშ ძიცას ვეჲაზადა,
სქან ტაბაკის ქიგნაჯინი,
გეგნილერჭყვე გჷნძე მადა;

ღორას წყარი მესქირჷნი,
ქიგჲლადგუმ სქჷბუს ზანდა,
ლერსი ვარი, ლებია ვერგ -
ოგურიათ ელნაზადა.

მინ მელერსე მარგალურცჷ
ტუტას მიშუტყურუანცჷ,
ჭყონიშ დაჩხჷრც - ალჲაკონცჷ,
თხომუს მიშუტურუანცჷ.

მარჩქილესჷ ორტინუანც,
წისქვილც ქიმკარულუანცჷ,
თიცალს თქუანც, ყვარიასჷ
კუდელც გეუფურუანცჷ…

მინცჷ თოფი გილუღ, მარა
იშენ ვარე მონადირე,
შხვაშ ნოტყელცჷ გაზუმინუ
მუჭოთ ჭანდი - მოლადირე;

თოლი არძას ალაბრსხუნა,
მარა ზღვა-ქვინც აკა ორწყე…
ჭიფელია ჭინჷშ ღობერ
სქვამას ირკოც ვაწკჷროწკე.

ბრელ იბურჭულ, მარა ლარჩვი
ბოყვ-ყამბარო ვადაროწკე,
გეშქჷრატილ ყებურიშო
ხინკ-ლახვაცა ვაკაბოწკე.

ანწ ქიკითხით: მუ ოკონი,
კვანწილ ლერსიშ ღობუასჷ,
დორჯგიმილი ბარჯგეფიში
ზღონდით გინოზღონდუასჷ.

წვანდიშ მოზგუმონჯუას დო
ლაბახათჷ ჭოფუასჷ,
უხუჯური ქარეფიშა
ბირცხაში მიკოსოფუასჷ?!..


გამოხატეთ თქვენი აზრი მოცემული ლექსის შესახებ კომენტარის სახით!..




კატეგორია: ლექსები | ნანახია: 140 | დაამატა: nikolozqartveli | ტეგები: ლექსები პოეზია, lasha gakharia, lasha gaxarias poezia, lasha gakharias poezia, lasha gaxarias leqsebi, lasha gaxaria, lasha gakharias leqsebi, ლაშა გახარია | რეიტინგი: 0.0/0
სულ კომენტარები: 0
სახელი *:
Email *:
კოდი *:


შესვლის ფორმა
ძებნა
კალენდარი
«  ივლისი 2015  »
ორსამოთხხუთპარშაბკვ
  12345
6789101112
13141516171819
20212223242526
2728293031
სტატისტიკა


სულ ონლაინში: 1
სტუმარი: 1
მომხმარებელი: 0