მთავარი » » ია ჯინჭარაძე – მესიზმრა, ნინო დარბაისელი იყო წინასწარმეტყველი.. / ia jincharadze - mesizmra, nino darbaiseli iko tsinastscarmetkveli

7:22 PM

ია ჯინჭარაძე – მესიზმრა, ნინო დარბაისელი იყო წინასწარმეტყველი.. / ia jincharadze - mesizmra, nino darbaiseli iko tsinastscarmetkveli

მესიზმრა, ნინო დარბაისელი
იყო წინასწარმეტყველი,
ფერადი მუთაქები შემოეწყო,
იჯდა და წინასწარმეტყველებდა.
მესიზმრა, ტოტებზე შემხმარი
საწყალი ბეღურები
სიცივეს იცილებდნენ,
ცა იყო ლურჯი და უცვლელი,
ცდილობდა, გაეცინა მზეს.
მესიზმრა, უგულო თებერვალი,
არც წყალი, არც თოვლი,
აქა-იქ გუგულის სოკოებით
და ფურისულებით,
ჩემი კუზიანი მეზობელი,
მკვდარი, შემომჩივლა –
ამ ჩემი სულელი
ბიჭის ჯავრით
ლამის სული გამძვრეს,
აბა ვინ მოუვლის
ავი, ფარღალალა
ქარების ქალაქში?
ძლივს გადმოყვანილი ფეხები

ფრთხილად შეალაგა მანქანაში.
და ახლა თქვენ გიყვებით
სხვა სიზმარში,
თუ როგორ მესიზმრა,
სიზმარი უცნაური,
როგორც პოლარული ციალი
და ვარ დაბნეული
მგზავრივით,
რომელსაც არ ახსოვს,
ბრუნდება? წავიდა?
ქუთუთოდამხობილი თვალივით
ვწრიალებ.