მთავარი » » სალომე ბენიძე - ვზივარ, გიხსენებ, გიმეორებ, გფურცლავ და გმარცვლავ / salome benidze - vzivar, gikhseneb, gimeore, vgurclav da gmarcvlav

6:32 AM

სალომე ბენიძე - ვზივარ, გიხსენებ, გიმეორებ, გფურცლავ და გმარცვლავ / salome benidze - vzivar, gikhseneb, gimeore, vgurclav da gmarcvlav

ვზივარ, გიხსენებ, გიმეორებ, გფურცლავ და გმარცვლავ,
გკითხულობ, გზვერავ, თვალს გაყოლებ, გათვალიერებ,
და მაინც, შენი ყოვლისშემძლე ღიმილის ნაცვლად,
დღეს მე და ივლისს თვალწინ გვიდგას სიცარიელე.

მინდა, მოგწერო, რომ არ ხდება აღარაფერი,
რომ გზას ვადგავარ, გზას, რომელიც არსად იწყება,
რომ ჩემს კედლებში, სხეულს რომ ჰგავს, მთვარის ნაფერებს,
ერთად ცხოვრობენ სიყვარული და დავიწყება,

რომ ჩემს თვალებში, რა ხანია, მტვერი დაბუდდა,
რომ მხრებზე მაწევს ღრუბლიანი ღამე ურყევი,
რომ მე ფერმკრთალი სიზმარი ვარ მზიან ზაფხულთა,
რომელიც ნახე და დილისპირს წყალს მოუყევი.

ვზივარ, გიხსენებ, გიმეორებ, გფურცლავ და გმარცვლავ,
გკითხულობ, გზვერავ, თვალს გაყოლებ, გათვალიერებ,
და სადღაც, შენი მზით დამწვარი მკლავების ნაცვლად,
მელის აგვისტო,
მდუმარება,
სიცარიელე.

სალომე ბენიძე