მთავარი » 2017 » ოქტომბერი » 12 » თორრნიკე ნაროზაული - გულგაყინულებს როგორც სჩვევიათ... / torrnike narozauli - gulgakinulebs rogorc schveviat...

2:46 PM

თორრნიკე ნაროზაული - გულგაყინულებს როგორც სჩვევიათ... / torrnike narozauli - gulgakinulebs rogorc schveviat...

გულგაყინულებს როგორც სჩვევიათ,
გამოვაცხადე სრული ემბარგო -
ჩემი ტკივილი მხოლოდ ჩემია,
სხვა დანარჩენი
ღმერთმა შეგარგოთ.

ნუ შეეხებით ჩემს სიმარტოვეს!
უსმინეთ
თქვენთვის
ძვირფას ავტორებს.
და მე დამტოვეთ. მარტო დამტოვეთ.

უცქირეთ თქვენთვის ძვირფას ნახატებს,
ადამიანებს - მოძრავ სტიკერებს.
მე კი, სიმწრით რომ არ ავხარხარდე,
პირს კვლავ ღიმილით ამოვიკერავ.

სწორედ ეს არის ჩემი სისუსტე
და ჩემი ძალაც. (გაგეცინებათ).
თქვენ
თქვენი
წილი სითბო ისუნთქეთ,
ჩემი სიცივე მე შემცივდება.

ნუ შეეხებით ჩემ სიმარტოვეს!
უსმინეთ
თქვენთვის
ძვირფას ავტორებს,
და მე დამტოვეთ. მარტო დამტოვეთ.

ილაპარაკეთ ჩემი სიჩუმის
სანაცვლოდ ჩემზე თქვენს მეგობრებთან,
სიყვარულს როგორ ვერ ვინარჩუნებ,
როცა ღალატი წინ მეღობება...

რაღა თქმა უნდა სიტყვა ღალატის
გამოკლებით ან გადანაცვლებით,
თქვენ მართალი ხართ,
ჩირად არა ღირს
ჩემი უბრალო სიტყვის მარცვლები;

და გამოყრილი ტანზე ეკლებად
ნერვებისა და შიშის ტანდემი.

გული ყოველთვის ღია მექნება,
მაგრამ გთხოვთ,
ყველა ნუ შებრძანდებით.

ნუ შეეხებით ჩემ სიმარტოვეს!
უსმინეთ
თქვენთვის
ძვირფას ავტორებს,
და მე დამტოვეთ. მარტო დამტოვეთ!

თორრნიკე ნაროზაული