მთავარი » 2017 » ოქტომბერი » 16 » ოთარ ჭილაძე - ბავშვი უკრავდა სტუმრების თხოვნით / otar chiladze - bavshvi ukravda stumrebis tkhovnit

12:12 PM

ოთარ ჭილაძე - ბავშვი უკრავდა სტუმრების თხოვნით / otar chiladze - bavshvi ukravda stumrebis tkhovnit

ბავშვი უკრავდა სტუმრების თხოვნით,
უცახცახებდა პატარა მხრები.
გარეთ კი თვითონ ბუნების ნებით,
თავგანწირულად დნებოდა თოვლი.

ჩნდებოდა მიწა, სველი და შავი,
როგორც დაწრეტილ მდინარეს ფსკერი.
და ხეებს, თუმცა არ ედოთ ფერი,
მაინც ამაყად ეჭირათ თავი.

ბავშვი უკრავდა სტუმრების თხოვნით,
ხოლო მუსიკა, ქარივით ლაღი,
ჭაღს აწყდებოდა და დიდი ჭაღიც
თრთოდა მუსიკის უცნაურ თრთოლვით.

ირგვლივ უძრავად ისხდნენ სტუმრები,
და სტუმრებისთვის უხილავ ცაში
მსუბუქი ფრთებით მიქროდა ბავშვი
და სხეულს ვეღარ გრძნობდა სრულებით.

ოთარ ჭილაძე