ამასაც თუკი ვეღარ გაიგებ, ნამში სასახლეს ავაგებ შენთვის და მერე ფიქრებს მოლზე დაგიგებ, იების ველზე გრძნობებად ფერხთით. თუ გსურს კენჭებშიც გავჩნდები გზებზე, რომ გამოიცნო, რომელი, სად ვარ ცისფერ ღრუბლებად გავწვები მზეზე, ნიავში მაინც შეგხედავ ნაზად...
იცი? ზაფხული ვიქნები თუნდაც, თუნდ - კოინდარი, თუნდ - პურის ყანა, ოღონდ მიპოვო, მომძებნო უნდა, მათი ბიბინი აღიქვა ქალად.
ან შემოდგომა ვიქნები შენთვის, წვიმის წვეთებში დავრჩები დარად. ან გაზაფხული თამამი, შლეგი, შენთვის ვიქნები მაცდური არა.
ხან ფოთლის თრთოლვად ვიქცევი უმალ, ატმის ყვავილში მიპოვი უცებ, ცვრიან ბალახზე ვიქნები უხვად, თუკი შეახებ სათუთად ტუჩებს.
მოდი, მომძებნე, მიპოვე მეთქი! ფიქრებს ესტუმრე და ფიქრის კვალად გრძნობას ყოველთვის რაღაცა ეთქმის, გულში მიპოვი? - მეძებე ხვალაც!
გამოხატეთ თქვენი აზრი მოცემული ლექსის შესახებ კომენტარის სახით!..
