მთავარი » 2014 » სექტემბერი » 25 » მარი ბეროძე - პოლიმერია / mariam beroidze - polimeria

5:56 PM

მარი ბეროძე - პოლიმერია / mariam beroidze - polimeria

თქვენ,
მამებო ჩემო
და დედებო ჩემო
და სიზმრებო ჩემო,
მუხლებზე დადექით
და მიწამდე დახარეთ თავები,
წამოდექით
და ბეჭებზე დაიწყვეთ ხელები!

ზემოთ, ქვემოთ, მარჯვნივ, მარცხნივ...
მოინანიეთ!

თქვენ,
ძმებო ჩემო
და დებო ჩემო
და სიმშვიდევ ჩემო,
სუდარაში გახვიეთ
ბილწი ზრახვები,
ანთებული სანთლებით
აავსეთ ტაბლა და
ფსალმუნების დაიწყეთ კითხვა!

ზევით, ქვევით, მარჯვნივ, მარცხნივ...
მოინანიეთ-მეთქი!

შენ,
სხეულო ჩემო
და სულო ჩემო
და ცხოვრებავ ჩემო,
იმედზე ჩამოდე შუბლი,
ფეხქვეშ შეიკეცე ზამთარი,
მკერდიდან გადევნე ყვავები
და ნუ შეწყვეტ თვითგვემას!

ზევით, ქვევით, მარჯვნივ, მარცხნივ...
გაუძელი!